ރާއްޖޭގެ ހަމަޖެހުމަށް އިސްކަން ދިނުން

މީގެ ދިހަ ދުވަސް ކުރިން ރާއްޖޭގެ ވެރިކަން ބަދަލުވުމާ އެކު ގައުމުގެ ސިޔާސީ މަސްރަހު ކިލަނބުވެފައިވާ މި ދަނޑިވަޅުގައި މަސްރަހު ފިނިކުރުމުގެ ރޫހެއް އަދި ނުފެނެ އެވެ. ޚިޔާލު ތަފާތުވާ ފަރާތްތަކުގެ މެދުގައި މަޝްވަރާކޮށް ހަމަ ބުއްދި ގަބޫލުކުރާ ފަދަ ގޮތަކަށް ކަންތައް ހައްލުކުރުމުގެ ރޫހެއް އަދި ނުފެނެ އެވެ. މި ގޮތުގައި ވެއަތުވެގެންދާ ކޮންމެ ހިނދުކޮޅެއްގައި ގައުމަށް ލިބޭނީ ގެއްލުމެވެ.

ވެރިކަން ފުރޮޅިގެން ދިޔަ ގޮތާ މެދު ސުވާލު އުފެދޭ ނަމަ އެކަން ހައްލުކުރެވޭނެ ގޮތްތަކެއް ވެސް އެބަހުއްޓެވެ. ތާއަބަދު އެ ވާހަކަ ދައްކައި އަޑުގަދަކުރުމުގައި ވަގުތު ބޭކާރުކުރުމުގެ ބަދަލުގައި ޝަރުއީ ދާއިރާގެ ތެރެއިން އެކަމާ މެދު ގޮތެއް ނިންމުމަށް އިސްކަން ދޭންޖެހެ އެވެ. އެކަން އެ ގޮތަށް ކުރަން ބޭނުންނުވެ، އާ ވެރިކަމެއް ގާއިމުކުރަން ބޭނުންވާ ނަމަ، އެކަންކުރުމަށް ވެސް ހަމަތަކަކާއި އުސޫލުތަކެއްގެ ތެރެއިން ހަރަކާތްތެރިވާން ޖެހެ އެވެ.

ހަމަ ގައިމު ވެސް ސިޔާސީ ދެބަސްވުމުގެ ތެރޭގައި ގައުމު ހަލަބޮލިކޮށްލުމަކީ ގައުމަށް ފައިދާ ހުރި ގޮތެއް ނޫނެވެ. އެއީ މިހާރުގެ ވެރިކަމުގައި ތިބި ބަޔަކަށް ވެސް އަދި މިހާރުގެ ވެރިކަމާ ދެކޮޅަށް އަޑުއުފުލާ ފަރާތްތަކަށް ވެސް ފައިދާ ހުރި ގޮތެއް ނޫނެވެ. ނުވަތަ އެ ފަރާތްތަކަށް ތާއީދުކުރާ މީހުންގެ މަސްލަހަތު ހުރި ގޮތެއް ވެސް ނޫންމެ އެވެ. މި ހުރިހާ ފަރާތްތަކެއްގެ މަސްލަހަތު ދެމެހެއްޓެން އޮތީ ގައުމުގައި ހަމަޖެހުން ގާއިމުކޮށްގެންނެވެ. ސިޔާސީ މަސްރަހު މިހާރަށް ވުރެ ފިނިކޮށްގެންނެވެ.

އެހެން ނަމަވެސް އަޅުގަނޑުމެން ވިސްނަންވީ، އަޅުގަނޑުމެންގެ މައްސަލަތައް އަޅުގަނޑުމެން އަމިއްލަ އަށް ހައްލުކުރުމަށެވެ. ގައުމުގެ ދާޚިލީ ކަންކަމުގެ ތެރޭގައި ބޭރުގެ ފަރާތްތައް ބައިވެރިކޮށްގެން ގެނެވޭ ހައްލަކީ ވަގުތީ ހައްލަކަށް ވެދާނެ އެވެ. އެހެން ނަމަވެސް، އެއީ ގައުމުގެ މަސްލަހަތު ދެމެހެއްޓޭނެ ހައްލަކަށް ނުވެދާނެ އެވެ. ގައުމަށް އެންމެ ފައިދާވާނީ ގައުމުގެ ކަންކަމާ ބެހޭ ގޮތުން، އަޅުގަނޑުމެންގެ މެދުގައި މަޝްވަރާކޮށް ވާހަކަދައްކައިގެން ހޯދޭ ހައްލެކެވެ.

ބައިނަލްއަގުވާމީ ދުނިޔޭގައި ކިތަންމެ ވަރަކަށް ރާއްޖޭގެ ވާހަކަތައް ފެތުރިފައި ވިޔަސް، މި ރާއްޖޭގެ މައްސަލަތަކުގެ އެންމެ ފުންމިނަށް އެ ފަރާތްތަކަށް ފީނިފައެއް ނުހުންނާނެ އެވެ. އެހެންކަމުން މި ރާއްޖޭގެ މައްސަލަތަކަށް ހައްލު ހޯދައިދިނުމަށް ބޭރުގެ ފަރާތްތަކަށް އެންމެ އެކަށޭނަ ގޮތެއްގައި މަސައްކަތެއް ނުކުރެވޭނެ އެވެ. ހަމަ އެހެންމެ ގައުމުގެ ދާޚިލީ ކަންކަމުގެ ތެރެއަށް ބޭރުގެ ފަރާތްތައް ވަނުމަށް އެންމެ ފަހަރަކު ވެސް ފުރުސަތެއް ދީފި ނަމަ، އެކަން ތަކުރާރުވާން ފަށާނެ އެވެ.

މިހާރުން މިހާރަށް ވެސް ގައުމީ މަސްލަހަތު ދެމެހެއްޓޭނެ ގޮތްތައް އެބަހުއްޓެވެ. އަޅުގަނޑުމެންގެ ސިޔާސީ ޕާޓީތަކަކީ އެއް ބަޔަކު އަނެއް ބައެއްގެ ޒާތީ ދުޝްމަނުންނެއް ނޫނެވެ. މީގެ ކުރިން ވެސް ސިޔާސީ ބޮޑެތި މައްސަލަތައް ކުރިމަތިވި ދަނޑިވަޅުތަކުގައި އެއް މައްސަލަތައް ހައްލުކުރީ މަޝްވަރާގެ މޭޒުދޮށުންނެވެ. މިއަދު ވެސް އެ ފުރުސަތު އެ ގޮތަށް އެބަ އޮތެވެ.

ނޯޓު: މިއީ ހަވީރު ނޫހުގައި ޝާއިރުކޮށްފައިވާ އެޑިޓޯރިއަލްއެކެވެ.