ނަމަވެސް، އެ މުޒާހަރާގެ މާނައާއި މަގުސަދު މިވަނީ އަންނި އަމިއްލައަށް ވެރިކަމުން ފޭބި ހިސާބުން ބަދަލުވެފައެވެ. މިއީ މިހާރު އަންނި ވެރިކަމަށް ގެނައުމަށާއި ކުރިން އަންނިގެ ވެރިކަމުގައި ދައުލަތުގެ ބޮޑެތި މަގާމުތަކުގައި ފަލަ މުސާރަދީފައި ތިބި ނާގާބިލު އެތަކެއް ކުދިންނެއް އަނެއްކާވެސް ކުރިން ހުރި މަގާމުތަކަށް ގެނައުމުގެ މުޒާހަރާއަކަށް މިވަނީ ބަދަލުވެފައެވެ. އެމްޑީޕީއަކީ ޑިމޮކުރަޓިކް ޕާޓީއަކަށް ވިޔަސް ޕާޓީގެ ނަމުގައި ބަޔަކު އެގެންދަނީ ކަންތައްތަކެއް ކުރަމުންނެވެ.
މީގެ އެންމެ އަލިގަދަ ހެއްކަކީ 17 ފެބްރުއަރީގެ މުޒާހަރާއެވެ. ޕާޓީގެ ގައުމީ މަޖިލީހުން ނިންމާފައިވަނީ އެރޭ ދަންވަރު 12 ޖެހުމުން މުޒާހަރާ ނިންމާލާގޮތަށެވެ. ނަމަވެސް، ވެރިކަމަށް ފެންބޮވައިގެންފައި ތިބި ބަޔަކު އަދި ތިމާމެންގެ އަރާމު ދިރިއުޅުން ދޫކޮށްލަން ޖެހުނު ބަޔަކު އެބުނަނީ ޑރ ވަހީދުގެ ސަރުކާރު ވެއްޓެންދެން ނުވަތަ އިންތިހާބަށް މުހުލަތެއް ދެންދެން މުޒާހަރާ ކުރިއަށް ގެންދާނެކަމަށާއި ރާއްޖޭގެ ހުރިހާ ތަނަކުން މީހުން މާލެ އައުމަށެވެ.
ކިހާ ދެރަކަމެއްތޯއެވެ؟ ޕާޓީގެ ދުސްތޫރީ ގުނަވަނަކުން ނުނިންމާ ކަމެއް ވަކި ބަޔަކަށް ނިންމިދާނެތޯއެވެ؟ އެހެންވެއްޖެނަމަ ޕާޓީ އެބޭނުންކުރެވެނީ ތިމާމެންގެ އަމިއްލަ މަސްލަހަތަށް ނޫންތޯއެވެ؟
ކުރިންވެސް، އަޅުގަނޑުމެން ވާނީ މިކަން ފާހަގަކޮށް ޕާޓީގެ ވެރިންނަށް ދަންނަވާފައެވެ. އެއީ ރައީސް ނަޝީދު ކުރެއްވި ވެރިކަމަކީ ޕާޓީއާ ގުޅުމެއް ހުރި ވެރިކަމަކަށް ނުވަނީ އެވެރިކަމުގައި ޕާޓީގެ އިންތިހާބީ ރައީސާއި ޕާޓީގެ ގުނަވަންތަކުގެ މަސްވަރާ ނުހޯދާކަމުންނާއި އަމިއްލަ އަމިއްލައަށް ތިމާގެ ރައްޓެހި އެކުވެރިން ކޮޅެއްގެ ބަސްއަހައިގެން ވެރިކަން ކުރައްވަމުން ގެންދަވާތީވެއެވެ. މަގާމުތަކަށް މީހުން ލުމާއި ސަރުކާރުގެ ސިޔާސަތުތައް ރޭވިގެން ދިޔައީ ޕާޓީގެ ތެރެއިން ނޫންކަން ނޭގޭ މީހަކު ޕާޓީގެ ލީޑަޝިޕުގައި ނޫޅޭނެއެވެ.
ކޮންމެ އަކަސް، އަޅުގަނޑުމެން ޕާޓީގެ ހެޔޮ ވިސްނޭ މީހުން މިގޮވާލަނީ އިންތިހާބެއް ބޯމަތިވަމުން ދާތަން އެބަ ފެންނަކަމަށާއި އެކަމަށް ތައްޔާރުވުމުގެ ގޮތުން ކުއްލި ކޮންގުރެސްއެއް އަވަހަށް ބޭއްވުމަށެވެ. ބޭނުމަކީ ޕާޓީގެ ހިންގުން ހަރުދަނާކުރުމަށާއި ޕާޓީގެ އިންތިހާބީ މަގާމުތަކުގެ ބާރުވެރިކުރުވައި، ޕާޓީގެ މެމްބަރުންގެ އިތުބާރު އަލުން ހޯދެއްވުމަށެވެ. ޕާޓީގެ ޗެއާޕާސަންއާއި ޕާޓީގެ ރައީސާއި އިސްލީޑަރުގެ ހައިސިއްޔަތު ކަނޑައެޅެން ޖެހެއެވެ. ވެރިކަމުގައި އޮންނައިރާއި އިދިކޮޅުގައި އޮންނަ އިރު ޕާޓީ ހަރަކާތްތެރިވާނެ ގޮތް އެނގެން އެބަޖެހެއެވެ.
ޕާޓީ އުފެދިގެން އައި އަސްލު ވިސްނުމަށް ރުޖޫއަވާން ޖެހެއެވެ. އެއީ ވަކި މީހެއްގެ ފަހަތުން ނުދުވުމާއި ރައްޔިތުން ބާރުވެރިކުރުވުމާއި ގާނޫނުގެ ވެރިކަން ކުރުމާއި މިނިވަން މީޑިޔާއެއް ގާއިމުކުރުމެވެ.
ހަމަ ގައިމުވެސް، މިހާރު އޮތް ގޮތަށް އޮއްވައި އަހަރެމެންނެއް އެމްޑީޕީއަށް ވޯޓުލުމުގެ ބަދަލުގައި ތިބޭނީ ގޭގައެވެ.
ލިޔުމާ ގުޅޭ ހަބަރު:
މި މުޒާހަރާތަކަށް ދެން ނުދާނަން: ޑރ. ޑީޑީ، ހަވީރު ނޫސް
Posts
0 comments: on "މިހާރު ކުރިއަށް ދަނީ އެމްޑީޕީގެ މުޒާހަރާއެއް ނޫން: ޕާޓީގެ ރައީސް"
Post a Comment