އެމްޑީޕީއިން ދެންވެސް ބުދުތައް ނަގަންވީ ނޫންހެއްޔެވެ؟

އެމްޑީޕީ މިއަދު މިވަނީ މިސަރުކާރުގެ ގޮނޑިކޮއްކޮއަކަށް ވެފައެވެ. ސަރުކާރު ހިންގަނީ އަންނި އާއި އޭނާ ކައިރީގައި އުޅޭ މާރިޔާފަދަ ދެތިން މީހެކެވެ. ސަރުކާރާއި އެމްޑީޕީ އާ ގުޅުމެއް ނެތްކަން ގޭގައި ގެންގުޅޭ ބުޅަލަށްވެސް އެނގޭނެއެވެ. އެމްޑީޕީގެ ސިޔާސަތުތަކެއް ސަރުކާރަކުން ތަންފީޒެއް ނުކުރެއެވެ. ޕާޓީގެ ރައީސްގެ ބާރެއް ނެތްކަން ނޭގޭ މީހަކު ޕާޓީގައި ނެތެވެ. ޕާޓީގެ ކޮންމެ ރަސްމީ ހަފުލާއެއްގައި ޕާޓީގެ ރައީސް ހުއްޓާ މާރިޔާ އަތުގައި ހިފައިގެން އަންނި އުޅޭ ސަބަބެއް ބުނެދީބަލާށެވެ؟ ނަމަވެސް، ސަރުކާރުން ބައިގިނަ ކުރަން ބޭނުންވާ ކޮންމެ ފަހަރަކު އެމްޑީޕީ މެމްބަރުންނަށް ގޮވާ އުޅެތެވެ.

މަދަނީ އިއްތިހާދުން ބާއްވަން އުޅޭ ބޮޑު މުޒާހަރާއާ ގުޅިގެން ކަން ހިނގާފައި މިވަނީ ވެސް މިބީދައިންނެވެ. އެމްޑީޕީގެ އަސާސީ ގަވާއިދުގައި އިސްލާމުދީން ހީމާޔަތްކުރާނެ ވާހަކަ ބުނެފައި އޮއްވާ، ރައީސް އޮފީހުގައި އުޅޭ ލާދީނީ ބައިގަނޑުގެ ރޭވުމާ އެއްގޮތަށް އިންސާނީ ހައްގުތަކާ ބެހޭ ޕިއްލޭ ގެނައީ ސަރުކާރުންނެވެ. ސާކު ގައުމުތަކަށް ލިޔެގެން ދީނީ މޮނިޔުމަންޓުތަކެއްގެ ގޮތުގައި ބުދު ގެނައީވެސް ސަރުކާރުން ބުނެގެންނެވެ. ކަނޑައެޅިގެން ޕާޓީގެ އަސާސީ ގަވާއިދާ ހިލާފަށް، ދީނީ މަސްވަރާ މަޖިލީހުން ދެކޮޅުހަދަހަދާ އޮއްވައެވެ.

މިހާރު މިވަނީ ދެބައިމީހުން މުޒާހަރާއަށް ދާން ގޮވާލި ހިސާބުން މަސްރަހު ހޫނުވެފައެވެ. މަދަނީ ޖަމުއްޔާތަކުން މުޒާހަރާކުރަން ޖެހޭ ސަބަބު ސާފެވެ. އެއްދުވަހުން އަނެއް ދުވަހަށް ސަރުކާރުގެ ތެރެއިން ލާދީނީ ކަންތައްތަކަށް ހިތްވަރުދިނުމާއި ގިނަ ބަޔެއްގެ ނުރުހުމުގައިވެސް އެފަދަ ކަންތައްތައް ކުރަމުން ގެންދިޔުމެވެ. ސުވާލު އުފެދެނީ އެމްޑީޕީއިން މުޒާހަރާއަށް ނިކުންނަނީ ކީއްވެގެން ހެއްޔެވެ؟ ހަގީގަތުގައިވެސް އިސްލާމުދީން ހިމާޔަތްކުރަން ހެއްޔެވެ؟ ނޫނީ ބަޔަކު މީހުން މުޒާހަރާކޮށް އައްޑޫގައި ހުރި ބޮޑުބުދުތައް ތަޅާ ސުންނާފަތިކޮށްފާނެތީ ހެއްޔެވެ؟

އެމްޑީޕީގެ މެމްބަރުން އިސްލާމުދީން ހިމާޔަތްކުރަން ބޭނުން ނަމަ އައްޑޫގައި ހުރި ބުދުތައް މިހާރުން މިހާރަށް ނަގަންވީ ނޫންހެއްޔެވެ؟ ރާއްޖޭގެ ގާނޫނުތަކާ ހިލާފު އެއްޗެއްކަން އެބަ އެނގެއެވެ. ގިނަ ބަޔަކު އެއެތަނުގައި ހުރުމަށް ނޭދޭކަން އެބައެގެއެވެ. ކޮންމެހެން ބަޔަކާ މައްލަވަކުރަން މަގުތަކަށް ނުކުތުމުގެ ބޭނުމަކީ ކޮބާހެއްޔެވެ؟ އަދި ނުވިތާކަށް، އެތަކެތި ނަގައިފިނަމަ، މިހާރު ބޮޑު މުޒާހަރާ ކުރާ މީހުންނަށް ސާފު މެސެޖެއް ދެވި، އެމީހުންގެ ހަގީގީ މަގުސަދު ގެއްލުވާ ލެވޭނެ ނޫންހެއްޔެވެ؟