ގާ އުކަން ޖެހުނީ ކީއްވެތޯ؟

މާރާމާރީ ހިންގުމަކީ ގޯސްކަމެކެވެ. ކުށްވެރިކޮށް، އަދަބު ދޭންޖެހޭނެއެވެ. ނަމަވެސް... ގާއުކަން ޖެހުނީ ކީއްވެތޯ ވިސްނާލަން ޖެހެއެވެ. ދީނީ މިނިވަންކަމަށް ގޮވާލައި، ތަންތަނަށް އެއްވެ، އިޖުތިމާއީ މަސްލަހަތު ނަގާލައި، ދާހިލީ ފިތުނަތަކަށް ދޮރުތައް ހުޅުވާލެވޭއިރު ފުލުހުންނަކަށް ނުފެނެއެވެ. ސަރުކާރުގެ ނުވަތަ ދައުލަތުގެ ނުވަތަ ދިވެހިރާއްޖޭގެ ގާނޫނު އަސާސީ ހިމާޔަތްކުރަން ތިބި މީހުންނަކަށް ނުފެނެއެވެ. ފިޔަވަޅެއް ނޭޅެއެވެ. އެފަދަ ކަންތައްތައް ކުރަން އުޅޭކަން އެނގޭއިރު، އެކަން ހުއްޓުވަން ކަމެއް ނުކުރެވެއެވެ. ގާނޫނު ތަންފީޒު ނުކުރެވޭ ކަން އެނގޭ ހިނދުގައި އެކަމެއް ހުއްޓުވަން ތެދުވާނީ އާއްމު މީހާ ދެއްތޯއެވެ؟ ނޫނީ ފަހުން ވާ ގެއްލުން މާ ބޮޑުވާނެއެވެ. ކަމަކަށް ނުހަދައި ދޫކޮށްލައިފިނަމަ، ދެން ފަހަރަކުން އެއްވާ މީހުން ގިނަވެފައި ގޮވާލާ ކަންތައްތައް މާ ހުތުރުވާނެއެވެ.

އޭއް ރައީސް ނަސީދެވެ. މިފަދަ ލާދީނީ ކަންތައްތަކަށް ހިތްވަރު ނުދޭށެވެ. އިޖުތިމާއީ މަސްލަހަތު ނަގާނުލާށެވެ. ގާއުކުން ފަދަ މައްސަލަތައް ހުއްޓުވޭނީ ވެރިކަމުގެ ސިފަތައް ރަގަޅުކޮށްގެންނެވެ. ނޫނީ އަމީންދީދީ ފަދައިން މަނިކުފާނުގެ ކަންތައް ނިމިގެން ގޮސްފާނެކަމަށް ޓަކައި އަޅުގަނޑުމެން ބިރުގަންނަމެވެ. އެފަދަ ދުވަހެއް ނުދައްކަވާށިއެވެ.