މަޖިލީހު މެމްބަރުން އަނެއްކާވެސް ޗުއްޓީއެއް ނަންގަވާށެ

މިހާރު ދެން މަޖިލީސް ކުރިއަށް ދާގޮތެއްވަނީ އެއް ނޫނެވެ. ބިލެއް ނެހެދޭ ތަނުގައި ރައްޔިތުންނަށް ފައިދާ ހުރި ކަމެއް ކުރެވެނީއެއްވެސް ނޫނެވެ. ދެން، އެހެން އުޅެފައި އަނެއްކާވެސް އަޑުއިވޭނީ ދައުރު ނިންމާފައި ޗުއްޓީއެއް ނަގާތަނެވެ. އޭރުން ބޭރު ގައުމުތަކަށް މެމްބަރުން ފުރުއްވައި އުފާކުރައްވާ އުޅުއްވާނެތެވެ. މިހާރުވެސް މީގެ ގިނަމީހުން އުޅޭނީ ރާއްޖެއިން ބޭރުގައި އާއިލާތައް ވަޒަންވެރިކޮށްގެންނެވެ.

މަޖިލިސް ޗުއްޓީވުމާއެކު ނުވަތަ ހަފުތާ ބަންދުތަކުގައި އުޅެނީ އެވެރިން އަބަދުވެސް ރާއްޖެއިން ބޭރުގައެވެ. ތިމާމެން ތަމުސީލުކުރާ އަތޮޅަކަށް ގޮސްލުން އެއީ ނެތްކަމެކެވެ. ރައްޔިތުން އުޅޭގޮތެއް ބަލާނެ އަޑުއަހާލާނެ މީހަކު ނުވެއެވެ. ބުނާގޮތުން ހަމަ ބުރަބޮޑީއެވެ. ގެރި ޒުވާބުކޮށް ވަރުބަލިވީ ކަން ނޭގެއެވެ؟ އެންމެ ހެއްވާކަމަކީ ދެމީހުން މަޖިލީހުގައި ޒުވާބުކޮށްފައި މަޖިލީހުގައި ސައިމޭޒުމަތީގައި ހޭންތިބޭތީވެއެވެ.

އަމިއްލަ އެދުމުން ފޯވެފައި ތިބި ބައިގަނޑެއް މިނޫނީ ނުދެކެމެވެ. ދައްކާ ވާހަކައިން ރައްޔިތުންގެ ހައްގުގައެވެ. ކުރާ ކަންތައްތަކުން ތިމާމެންގެ އަމިއްލަ މަސްލަހަތެވެ. ރައްޔިތުންގެ ފައިސާ އިސްރާފުކުރުމުގައި ލާމަސީލު މިސާލެކެވެ. ރީކޯއެއް ރިޔާޒު ރަޝީދެއް މަހުލޫފެއްގެ ވާހަކަ ދެއްކުމުގެ ބޭނުމެއް ނެތެވެ. ހަމަ އެއްބަޔެކެވެ.

ދެންވެސް އަނެއްކާ މިއެޕިސޯޑު ނިންމާލުމުގެ ގޮތުން ޗުއްޓީއެއް ނަގާށެވެ. އޭރުން ހުރިހާ ކަމެއް ހުންނާނީ ވެފައެވެ. ޗުއްޓީ ނަގާށެވެ. ދެން އަންނަ ދައުރަށް ވޯޓުލާ ދުވަސް ޖެހެންދެން ޗުއްޓީއެއް ނަގާށެވެ. މިހާރު ތިޔަ ބާއްވާ ޖަލުސާތަކުން ވަނީ އިސްރާފެވެ. ސައިފޮދާއި ތަނުގެ ބިލާއި އިދާރީ ހަރަދެވެ. ގައިމު ޗުއްޓީ ނެގުމުން މިހަރަދުތައް ކުރާކަށް ނުޖެހޭނެއެވެ. ބޮޑަށް ރަނގަޅީ މުސާރަ ނުލިބޭ ގޮތަށް ޗުއްޓީ ނެގުމެވެ. ކާނަލްމެން ވަރަށް ނުރުހޭނެކަން އެގެއެވެ.

ނިންމާލުމުގެ ކުރިން ބުނެލަން ޖެހޭ ވާހަކައެއް އެބައޮތެވެ. ހަމަ މިހާރުން މިހާރަށްވެސް ރައްޔިތުންގެ މަޖިލީހުގެ މެމްބަރުންގެ އަދަދު މަދުކޮށް، މުސާރަ ދަށްކޮށް، މެމްބަރުން މަޖިލީހަށް ހާޒިރު ނުވާ ދުވަސްތަކުގެ މުސާރަ ކެޑުމަށް ފެންނަ ނުފެންނަ ވޯޓެއް ނެގުމަށް ރައީސް ނަޝީދަށް އިލުތިމާސްކުރަމެވެ. ގަޓްސްއެއް ހުރި މީހެއް ކަމަށް އަހަރެމެން ގަބޫލުކުރާނީ އޭރުންނެވެ.