ހިޔާނާތްތެރިންނަށް އިއްޒަތް އެރުވުމަކީ ހެޔޮވެރިކަމެއް ކުރުންބާ؟

އަންނި އަބަދުވެސް އަގައިން ބުނާ ބަހެއް އޮވެއެވެ. އެއީ ހެޔޮވެރިކަމެއް ކުރާ ވާހަކައެވެ. ނަމަވެސް، މިއަދާ ހަމަޔަށްވެސް އެބުނާ ހެޔޮވެރިކަމެއް މިއޮތީ ނުފެނިފައެވެ. ޒައީމު މައުމޫނަށް ވުރެ ރައްޔިތުމީހާއަށް ރަނގަޅަށް ކުރި ކަމެއް އަޅެ ބުނެބަލާށެވެ. ކަންމަތި ފިހާރައިގެ ދަރަނި ކަނޑާލުން ހެއްޔެވެ؟ ނޫނީ ތަކެތީގެ އަގު ހެޔޮކުރުން ހެއްޔެވެ؟

ވިސްނާ ވިސްނާވެސް ހެޔޮވެރިކަމެއް ކުރަން ބުނި ކަލޭގެ ކުރަން އުޅޭ ކަމެއް ނުވިސްނުނެވެ. ދެން މިފެނުނީ މިގައުމު ދުށް އެންމެ ބޮޑު ހިޔާނާތްތެރިޔާ ނުވަތަ ބޮޑުކަޓު އިބްރާހީމް ހުސެން ޒަކީއަށް ދައުލަތުގެ އިއްޒަތް އެރުވިތަނެވެ. ކޮންކަމެއް ކޮށްގެންހެއްޔެވެ؟ އެންޑީޕީ ވެރިކަމަށް ގެނެސްދީ އަންނިގެ ވަފާދާރަކަށް ހުރީތީ ހެއްޔެވެ؟ ނޫނީ ޓޫރިޒަމް މިނިސްޓަރަށް ހުރެގެން ކަޓުނެގީމާ ހެއްޔެވެ؟

ބަލަ އަންނީވޭއެވެ. އިއްޒަތާ ލަގަބު ބަހައްޓާފައި ކުރިން ބުނިހެން ހެޔޮވެރިކަމެއް ކުރަމާ ބަހީއެވެ. ހެޔޮވެރިކަމެއް ކުރެވޭނީ ފުރަތަމަ ޒަކީމެން ކަހަލަ ހިޔާނާތްތެރިން ވެރިކަމުގެ ކޯލުން ދުރުކޮށްގެންނެވެ. އަދި އެއަށްފަހު ކަމަށް ގާބިލު މީހުން މަގާމުތަކަށް ލައިގެންނެވެ. ކުލައަށް މޫނަށް ބަލަންޏާމު ރަނގަޅު މީހަކު ނުފެންނާނެއެވެ. ތިޔައީ މިގައުމުގެ އެންމެންގެ ރައީސްކަން ހަދާންކުރާށެވެ.
ދެން އެއަށްފަހު، މާރިޔާމެން ކަހަލަ ތިމާ އިސްގީގޮތުން ލޯބިވާ މީހުން ދޫކޮށްލާށެވެ. ޖަޒުބާތަކީ ތިމާގެ ނިންމުންތައް ކަށިކާރު ކުރާއެއްޗެކެވެ. މިހާރުވެސް ލައްކަ ގޯސް ހެދިއްޖެއެވެ. މުޅި ސަރުކާރުގައި ޒައީމުމެން ތިމާގެ ކުދިންނޭ ކުރިން ގޮވަމުން ދިޔައިރު މިހާރު ސަރުކާރުގައި މިއޮތީ މާރިޔާގޭ ހުރިހާ ކުދިންނެވެ. މާރިޔާ ރުއްސަން ދޮތައެވެ؟ ކަލޯއަކީ ވަގެކޭ ކިޔާގެން ދައުވާގެ ބަޔާން މާރިޔާ މުނައްވަރަށް ލިޔެދިންކަން މިހާރު ހަދާނެއްވެސް ނެތަދޯއެވެ؟

އެކަން ބަހައްޓާފައި ހެޔޮވެރިކަމެއް ކުރެވޭތޯ އުޅޭމާހެއްޔެވެ؟ ބަގީޗާގޭ މުހައްމައިދީމެން ކަހަލަ ބޭކާރު މީހުން ވަކިކޮށް އެލާރިކޮޅުން ފަންޑެއް ހުޅުވައި ކަންމަތި ދަރަނި ހަލާސްކޮށްގެން އުޅެމޭ ހެއްޔެވެ؟ ރައްޔިތުން އެއްލާލި އަފީފު އާއި މުހައްމައިދީ އާ ގައިދޮށަށް ލައިގެން ތިޔައުޅެނީ ވެރިންގެ ފަރާތުން ރައްޔިތުންނަށް ފައިދާއެއް ވާތީ ހެއްޔެވެ؟ ބަލަ، ދޮގުނަހަދާ ތެދަށް ބުނާށެވެ؟ ކަލޯއާ މަހުޝަރު ދުވަހުން ނަމަވެސް މިކަމާ ސުވާލުކުރާނެ މީހުން ތިބޭނެއެވެ.

ހެޔޮވެރިކަމެއް ކުރެވޭނީ ގަޓެއް ހުރެގެންނެވެ. އެގަޓެއް އަދި ނެތެވެ. ނިކަން ކެރެންޏާމު ފަހަރި ސިއްހަތާ ބެހޭ ވަޒީރާކަމުން ވަކިކޮށްބަލާށެވެ. އެކަމަނާއަށް ކަމެއް ނުވާކަން އަހުރެންނާ އެއްވަރަށް ކަލޯއަށްވެސް އެގޭނެއެވެ. މިގައުމުގައި ޑިންގޯ ހުންޖެހި ކުއްޖަކަށް ފަހު ކުއްޖަކު ދުނިޔެ ދޫކުރިއިރު އެކަމަނާ ކޮބާހެއްޔެވެ؟ ސިއްހަތާ ބެހޭ ބޮޑު ވުޒާރާއެއް ހުރިއިރު ޑިންގޯ ކަންތައްތައް ރައީސް އޮފީހުން ބަލަންޖެހުނީ އެކަމަނާއަށް އެކަން ނުވެގެން ދޮތައެވެ؟ ބުނަން ނުކެރިގެން ތިޔައުޅެނީ ކީއްވެގެން ހެއްޔެވެ؟