މުޒާހަރާ ކުރާ ފަރާތްތަކުން ފުލުހުންގެ ވާޖިބަށް ހުރަސް އަޅަމުންދާތީ އެޗްއާރުސީއެމްއިން ކަންބޮޑުވުން ފާޅުކޮށްފި

މުޒާހަރާ ކުރާ ފަރާތްތަކުން އަމަން ބަލަހައްޓާ ފަރާތްތަކާއި ހުތުރުބަހުން މުޚާތަބުކޮށް ތަކެތި އުކާ ފުލުހުންގެ ވާޖިބަށް ހުރަސް އަޅަމުންދާތީ އެކަމާއި ހިއުމަން ރައިޓްސް ކޮމިޝަން އޮފް ދި މޯލްޑިވްސްއިން ކަންބޮޑުވުން ފާޅުކޮށްފިއެވެ.

އެޗްއާރުސީއެމްއިން މިއަދު ނެރެފައިވާ ނޫސްބަޔާނެއްގައި ބުނެފައިވަނީ، މުޒާހަރާ ކުރަމުންދާ ފަރާތްތަކުން ފުލުހުންނާއި ދިމާއަށް ފުޅި، ގައު، ބެޓެރި ފަދަ ތަކެތި އުކާ ފުލުހުންނަށް އެކިވަރުގެ އަނިޔާ ދީފައިވާކަމާއި ފުލުހުންގެ ބެރިކޭޑްތަކުގައި ރޯކުރުމާއި ފުލުހުންގެ ވާޖިބަށް ހުރަސް އެޅޭފަދަ ކަންތައްތަކެއް ކޮށްފައިވާކަން ފާހަގަކުރެވޭކަމަށެވެ. އަދި އެކަމަކީ ސުލްހަވެރި މުޒާހަރާއެއްގައި ފެނިގެންވާނެ ކަންތައްތަކެއް ނޫން ކަމަށާއި މުޒާހަރާކުރާ ފަރާތްތަކުންވެސް އަމަން ބަލަހައްޓާ ފަރާތްތަކާއި ކުރިމަތި ނުލުމަށާއި އަދި އެފަރާތްތަކުގެ ވާޖިބަށް ހުރަސްއެޅޭފަދަ ކަންތައްތައް ނުކުރުމަށް ހިއުމަން ރައިޓްސް ކޮމިޝަނުން ގޮވާލާފައިވެއެވެ.

މިހާރު ރާއްޖެ އޮތް ހަލަބޮލި ހާލަތުގައި ދައުލަތުގެ އިމާރާތްތަކުގައި އަދި މުދަލުގައި ހުޅުޖެހުމާއި ގެއްލުންދިނުމުގެ އަމަލުތަކަކީ އެއްވެސް ފަރާތަކުން ކޮށްގެންވާނެ ކަމެއް ނޫންކަންވެސް އެބަޔާނުގައި ފާހަގަކޮށްފައިވެއެވެ. އަދި އެފަދަ އަމަލުތަކަކީ ކަނޑައެޅިގެން އިންސާނީ ހައްގުތަކާއި ދެކޮޅުވެރި އަމަލުތަކެއް ކަމަށްވާތީ އެކަންކަން ކޮމިޝަނުން ހަރުކަށި އިބާރާތުން ކުށްވެރި ކުރާކަމަށް އެބަޔާނުގައި ފާހަގަ ކޮށްފައިވެއެވެ.

މިހާރު ހިނގަމުންދާ މުޒާހަރާތައް ކަވަރކުރަން އުޅޭ މީޑިޔާގެ އެކި ފަރާތްތަކަށް އެކިވަރުގެ އަނިޔާއާއި ގެއްލުން ދިނުމާއި އަދި ވަކި ފަރާތްތަކަކަށް އަމާޒުކޮށް އަނިޔާ ދެމުންދާތީ ކޮމިޝަނުންވަނީ ކަންބޮޑުވުން ފާޅުކޮށްފައެވެ.

 

އާއްމު ރައްޔިތުންނަށް އެކަންކަމުގެ ޚަބަރާއި މައުލޫމާތު ފޯރުކޮށްދިނުމަށް ބުރަ މަސައްކަތްކުރާ ނޫސްވެރިންގެ މިނިވަންކަމަށް އުނިކަން ނުލިބޭ ގޮތަށާއި މީޑިޔާގެ ފަރާތްތަކަށް އަނިޔާ ނުލިބޭނެ ގޮތަށް އަދި އެފަރާތްތަކުގެ މަސައްކަތަށް ބުރޫ ނާރާނެގޮތަށް ހުރިހާ ފަރާތްތަކެއްގެ އަމަލުތައް ބެހެއްޓުމަށްވެސް ކޮމިޝަނުގެ ބަޔާނުގެ ގޮވާލާފައިވެއެވެ.

އެއްވެ އުޅުމާއި ހިޔާލު ފާޅުކުރުމުގެ މިނިވަންކަމުގެ ހައްޤަށް ނުވަތަ އަދި މިނޫން އެހެން ހައްގުތަކަށް އުނިކަމެއް އަންނަނަމަ ނުވަތަ ގެއްލޭނަމަ އެފަދަ މައްސަލަތައް ކޮމިޝަނުން ބަލަމުންދާނެ ކަމަށާއި، ކަމާބެހޭ ފަރާތްތަކުން ހައްގުތައް ރައްކާތެރިކުރުމަށް ޒިންމާދާރު ކުރުމަށް ހިއުމަން ރައިޓްސް ކޮމިޝަނުން ކެނޑިނޭޅި މަސައްކަތް ކުރަމުންދާކަމަށް އެބަޔާނުގައި ބުނެފައިވެއެވެ.

 

މީގެ އިތުރުންވެސް ސުލްހަވެރި މުޒާހަރާއެއްގެ ނަމުގައި އެމްޑީޕީން އިންތިޒާމުކޮށްގެން މާލޭގައި ބާއްވަމުންގެންދާ ސިލްސިލާ މުޒާހަރާގެ ތެރެއިން ވޭތުވެދިޔަ 48 ގަޑިއިރުގެ ތެރޭގައި ދިވެހި ފުލުހުންނަށް ސީދާ އަމާޒުކޮށް ގައު އުކާ ހިންގަމުންދިޔަ ޤާނޫނާއި ޚިލާފު އަމަލުތަކުގެ ސަބަބުން ޤާނޫނީ ވާޖިބު އަދާކުރަމުން ގެންދިޔަ ފުލުހުންނާއި ސިފައިންނަށް އެކިވަރުގެ އަނިޔާތައް ވެފަވާތީ އެކަން ހަރުކަށި އިބާރާތުން ކުށްވެރި ކުރާކަމަށް މިނިސްޓްރީ އޮފް ހޯމް އެފެއަރޒުންވަނީ ބުނެފައެވެ.

ސޯސް: ހާމަ ނޫސް