ކެނެރީގޭ ނަޝީދުވަނީ އެމްޑީޕީއަށް ގައްދާރުވެފައި

އެމްޑީޕީ އުފެއްދީ ޑިމޮކުރަސީގެ އުސޫލުން ވެރިކަން ކުރުމަށެވެ. ނަމަވެސް، ނަޝީދުގެ 3 އަހަރަކީ ރާއްޖޭގެ ޅަފަތުގެ ޑިމޮކުރަސީ ފުޑާލައި އެމްޑީޕީގެ އަސާސީ ގަވާއިދާ ހިލާފަށް ހިންގި ވެރިކަމެކެވެ.

ފުރަތަމަ ސަބަބަކީ ނަޝީދުގެ ވެރިކަމުގައި ދައުލަތުގެ މީޑިޔާވަނީ ހިސޯރުކުރެވިފައެވެ. އެދެތަން ހިންގަމުން ދިޔައީ ރައްޔިތުންގެ މަޖިލީހުން ފާސްކުރި ގާނޫނާއި އަދި ޝަރުއީ ކޯޓުގެ ހުކުމްތަކާ ހިލާފަށެވެ. ޑިމޮކުރަސީގެ އުސޫލުން ވެރިކަން ކުރާއިރު މީޑިއާ މިނިވަން ވާން ޖެހެއެވެ.

ދެވަނަ ސަބަބަކީ ރައްޔިތުންގެ ބާރުތައް ހަނިކުރުމެވެ. ޑިމޮކުރަސީގެ އެންމެ މުހިއްމު އަސާސަކީ ރައްޔިތުން ބާރުވެރިކުރުމާއި ރައްޔިތުން ގޮތް ކަނޑައެޅުމެވެ. ތިމާގެ ލީޑަޝިޕު ފެއިލުވުމާއި ރައްޔިތުން ބަލައިނުގަތުމުން ލޯކަލް އިންތިހާބުން ފޭލިވުމުން ގައުމީ އިދާރާތަކެއް އުފައްދައި ކައުންސިލުތަކުގެ ބާރުވަނީ ކަނޑުވާލާފައެވެ. މިއީ ހުދު މުހުތާރު ވެރިންގެ ގޮތެވެ.

ތިންވަނަ ސަބަބަކީ ގާނޫނުގެ ވެރިކަމުގައި ކޮޅުފައިން ޖެހުމެވެ. ޑިމޮކުރަސީގެ އުސޫލުން ވެރިކަން ކުރުމަކީ އެތަނެއްގައި ހެދިފައި ހުންނަ ގާނޫނުތަކަށް ބޯލެބުމެވެ. ތިމަތިމާއަށް ފެންނަ ގޮތެއް ހެދުމެއް ނޫނެވެ. ނަމަވެސް، ނަޝީދުގެ ވެރިކަމުގައި ގާނޫނާއި ހިލާފަށް އެތަކެއް ކަމެއް ކޮށްފައިވާ ކަމަށް ހައިކޯޓުންނާއި ސުޕުރީމު ކޯޓުން ވަނީ ކަނޑައަޅާފައެވެ.

އެމްޑީޕީގެ އަސާސީ ގަވާއިދުގެ އެންމެ މުހިއްމު އެއް މާއްދާއަކީ އިސްލާމީ އުސޫލު ހިފެހެއްޓުމެވެ. ނަމަވެސް ނަޝީދުވަނީ ކަނޑައެޅިގެން މިކަމުގައި އެގަވާއިދާ ހިލާފަށް އިސްލާމުދީނުގެ ނޫރު މިފަސްގަނޑުން ފަޑުކޮށްލުމަށް މަސައްކަތްކޮށްފައެވެ. އަދި އެކަމަށް އިއުތިރާފުވެ އެމެރިކާގެ ވޮށިންޓަން ޕޯސްޓް ނޫހަށް އިންޓަވިއުދީފައެވެ.

ރޭގަނޑު މީހުން ނިދާފައި ތިއްބާ ދަންވަރު ގޭގެއަށް ސަލާމަތީ ބާރުތައް ފޮނުވައިގެން މީހުން ވަގަށް ނެގުމަކީ ޑިމޮކުރަސީގެ ވެރިން ކުރާ ކަންތައްތަކެއް ނޫނެވެ. ނަމަވެސް، ނަޝީދުވަނީ ގާޒީއަކު ވަގަށް ނަގާފައެވެ. ބަހަނާއަކީ އިންސާފު ހޯދައިދިނުމާއި ޝަރުއީ ދާއިރާ މިނިވަންކުރުމެވެ. އެކަމަކުވެސް، އޭނާ 22 ދުވަސްވަންދެން ވަގަށް ނަގައިގެން ގެންގުޅުނުއިރުގައި އެބުނި ކަމެއް ނުކޮށްދެވުނެވެ. ނިޔަތް ތަފާތުކަން އެގެނީ އެހެންވެގެންނެވެ.

ނަޝީދުގެ ވެރިކަން ފާހަގަކުރެވިފައިވަނީ ތިމާގެ ރައްޓެހިންނަށް ކޮށްދިން ވެރިކަމެއްގެ ގޮތުގައެވެ. އެމްޑީޕީގެ ޕޯޑިއަމްއާއި އެމްޑީޕީގެ މެނިފެސްޓޯ ބޭނުންކުރީ ތިމާގެ ވެރިކަމުގެ ސައްހަކަން ހޯދުމަށާއި އެމްޑީޕީ މެމްބަރުން ލޮސް އުނދޯއްޔަށް ލުމަށެވެ. މިހެން ބުނަން ޖެހުނީ ވެރިކަމުގެ 3 އަހަރުގައި ސަރުކާރުގެ މުހިއްމު ނިންމުންތައް ޕާޓީއެކު ހިއްސާ ނުކުރާތީވެއެވެ. ހާއްސަކޮށް ސިޔާސީ މަގާމުތަކަށް މީހުން ލުމުގައި ޕާޓީގެ ހިއްސާއެއް ނެތެވެ. ސަރުކާރުގެ މުހިއްމު ސިޔާސަތުތައް ނިމިގެން ގޮސްފައިވަނީ އެކުވެރި ރައްޓެހިންގެ ތެރެއިންނެވެ.

މާލޭގައި ރާވިއްކަން އުޅުމާއި މަތީ ސާނަވީއިން ދިވެހި އިސްލާމުގެ ބާރު ކަނޑުވާލަން އުޅުން ފަދަ ކަންކަމުގައި ޕާޓީއާ އެކު މަސްވަރާކޮށް ހިޔާލު ބަދަލުކޮށްފައެއް ނުވެއެވެ. ރާއްޖޭގެ އިގްތިސޯދު އަޑިއަޅާލައި ބޮއްސުން ލައިގެން ދިޔައިރުވެސް ޕާޓީގެ މަސްވަރާ ހޯދާފައެއް ނުވެއެވެ.

ވަކިން ހާއްސަކޮށް ވެރިކަމުން އިސްތިއުފާދިން އިރު ޕާޓީގެ ރައުޔުއަކީ ޕާޓީގެ ގުނަވަންތަކުން ދެކޭގޮތަކީ ބަލާފައެއް ނުވެއެވެ. ހަމައެކަނި ތިމާ އިތުބާރުކުރޭ ރައްޓެހިން ކޮޅަކާ މަސްވަރާކޮށް އިސްތިއުފާދިނީއެވެ.

ފާއިތުވީ ދުވަސްތަކުގައި 4 އިންތިހާބު ބޭއްވިފައިވާއިރު އޭގެ ތެރެއިން 3 އިންތިހާބު ވަނީ އެމްޑީޕީއަށް ގެއްލިފައެވެ. ކާށިދޫ ގޮޑިޔާއި މުސްތަފާބޭގެ ގޮޑިވަނީ ގެއްލިފައެވެ. މިއީ ރައްޔިތުން ރައީސް ނަޝީދުގެ ވެރިކަމާއި އޭނާގެ އުސޫލުތައް ބަލައި ނުގަންނަކަމުގެ ހެކިތަކެކެވެ.

ނަޝީދުގެ އަމަލުތަކުގެ ސަބަބުން އެމްޑީޕީ މިއަދު މިވަނީ ސިޔާސީ ހަޔާތުން އެކަހެރިވެފައެވެ. އެހެން ހުރިހާ ޕާޓީތަކެއް އެމްޑީޕީއާ ދެކޮޅުވެރިވެފައެވެ. ރިޔާސީ އިންތިހާބެއްގައި ދެވަނަ ބުރުގައިވެސް ކޮލިޝަން ހަދާނެ ބަޔަކު މިހާރަކު ނެތެވެ. އަދި ނަޝީދާ އެކު ކޮލިޝަން ހަދައިގެން ކަމެއް ކުރެވިދާނެ ކަމަށް އެހެން ސިޔާސީ ލީޑަރުންނެއް ނުދެކެއެވެ. ދައުލަތުގެ ހުރިހާ މުއައްސަސާތަކެއް ނަފުރަތު ކުރާ ބަޔެއްކަމުގައި މެމްބަރުން ވެފައެވެ.

އެހެން މީހުންނަކީ ގައްދާރުން ކަމާއި ބާގީން ކަމަށް ބުނަމުން ނަޝީދު ދާއިރު ނަޝީދުގެ އެދުން އޮތީ އެމްޑީޕީއަށް މޮޅެއް ހޯދައިދިނުމެއް ނޫނެވެ. އަމިއްލަ މަސްލަހަތު ކުރިއެރުވުމާއި އެބުރި ވެރިކަމަށް އައުމެވެ. އަލްހާނުމެން ބާގީންނާ ބައްދަލުކުރުމުން ބާގީއަކަށް ވެއްޖެއެވެ. ނަމަވެސް، ނަޝީދު ބަޑޮހަށް ގޮސް ބާގީންނާ ބައްދަލުކުރުމުން ބާގީއަކަށް ނުވިއެވެ. ކުރީގެ ފިނޭސް މިނިސްޓަރު އިނާޒު ޔާމީނާ ބައްދަލުކުރުމުން ހިޔާނާތްތެރިއަކަށް ވެއްޖެއެވެ. ނަމަވެސް، ނަޝީދު ޔާމީނާ ބައްދަލުކުރުމުން ހިޔާނާތްތެރިއަކަށް ނުވެއެވެ.

ނަޝީދުވަނީ ޔާމީނަށް ވެރިކަން ހޯދައިދިނުމަށް އެމްޑީޕީގެ މަޖިލީހުގެ މެމްބަރުންގެ ކައިރީގައި ވާހަކަ ދައްކާފައެވެ. ނަޝީދު އެމްޑީޕީއަށް ހުރި ވަފާތެރިކަމަކީ މިއީ ހެއްޔެވެ؟ ރައްޔިތުންގެ ތާއީދު ގެއްލި، އިންތިހާބުތަކުގައި ނާކާމިޔާބުވެ، ތިމާ ދެން ނުކުމެއްޖެނަމަ އެމްޑީޕީއަށް ރިޔާސީ އިންތިހާބު ނާކާމިޔާބުވާނެކަން އެނގޭއިރުވެސް ވެރިކަމުގައި ބަގުޑި ބައްދައިގެން އެހުންނަނީ އެމްޑީޕީއަށް ހެޔޮއެދޭތީ ހެއްޔެވެ. ނޫނީ ތިމާގެ މަސްލަހަތަށް ހެއްޔެވެ؟