މަޖިލިސް ކުރިއަށް ގެންދަން ރައްޔިތުން ނުކުންނަން ވެއްޖެ: މަހްލޫފް

ކޯރަމް ގެއްލިގެން ރައްޔިތުންގެ މަޖިލީހުގެ ޖަލްސާތައް ކުރިއަށް ނުދާ މައްސަލަ ހައްލުކުރުމަށް ރައްޔިތުން ނުކުންނަން ވެއްޖެ ކަމަށް ޕީޕީއެމްގެ ތަރުޖަމާނު އަދި ގަލޮޅު ދެކުނު ދާއިރާގެ މެމްބަރު އަހްމަދު މަހުލޫފު ވިދާޅުވެއްޖެ އެވެ. މަހްލޫފު ވިދާޅުވީ ރައްޔިތުންނާ ގުޅޭ މުހިންމު ބިލްތަކެއް މަޖިލީހުގައި ހުރިއިރު، ކޮންމެ ދުވަހަކު ކޯރަމްގެ ގެއްލުން ހުއްޓުވަންޖެހޭ ކަމަށެވެ. އަދި ކޯރަމްގެ މައްސަލަ ދިމާވަނީ ހަމައެކަނި އެމްޑީޕީގެ މެމްބަރުންގެ ސަބަބުން ނޫން ކަމަށް ވެސް އޭނާ ވިދާޅުވި އެވެ."ވަކި ބައެއްގެ ސަބަބަކުން ނޫން ކޯރަމް ގެއްލެނީ. އެކަމަކު އެމްޑީޕީގެ މެމްބަރުން ބޭނުން ނުވާ ކަމެއް ނަމަ އެ މެމްބަރުން އެއްކޮށް ވޯކްއައުޓް ކުރޭ. އެމްޑީޕީގެ މެމްބަރުންނަށް އެ ފުރުސަތު ނުދިނުމަށްޓަކައި އެހެން މެމްބަރުން ޒިންމާދާރުވާންޖެހޭ،" މަހްލޫފު ވިދާޅުވި އެވެ.

"ބޮޑު މުސާރަ ނަންގަވާއިރު މެމްބަރުންގެ ވެސް އަމިއްލަ ޒިންމާއެއް އޮންނާނެ."

މަހްލޫފު ވިދާޅުވީ މަޖިލީހުގެ ކޯރަމްގެ މައްސަލައިގައި ހުރިހާ ރައްޔިތުން އަޑު އުފުލަން ނުކުތުން މުހިންމު ކަމަށާއި ކޯރަމްގެ މައްސަލައިގައި މުޒާހަރާކުރުމަށް ޕީޕީއެމްގައި މަޝްވަރާކުރާނެ ކަމަށެވެ.

މަތީގައި އެވަނީ ދުވަހު ނޫސް ހަވީރުގައި އިއްޔެ ލިޔެފައިވާ ލިޔުމެކެވެ.

ކޯރަމް މައްސަލަ ހައްލުކުރުމަށް ކުރާނެ ކަންތައްތައް:

1. މަޖިލީސް ދޮށުގައި ރައްޔިތުން މުޒާހަރާކޮށް، އަންނަނިވި ކަންތައްތަކަށް ގޮވާލުން
    (ހ) ހާޒިރީ ދަށް މެމްބަރުން މަޖިލީހުން ބޭރުކުރުމަށް ގޮވާލުން
    (ށ) މަޖިލީހުގެ ގަވާއިދު އިސްލާހުކޮށް މެމްބަރުންގެ މުސާރަ އުނިކުރުމަށް ގޮވާލުން
    (ނ) މަޖިލީހުގެ މެމްބަރުންގެ ހާޒިރީ މަޖިލީހުގެ ބޭރުގަޔާއި ވެބްސައިޓުގައި އާއްމުކުރުން
2. މަޖިލީހުގެ ގަވާއިދަށް އިސްލާހު ހުށައަޅާ ޖަލްސާތަކަށް ހާޒިރު ނުވާ މެމްބަރުންގެ މުސާރައާއި އެލަވަން އުނިކުރުމަށް ފާސްކުރުން
3. ކޮންމެ ދައުރެއްގެ ހާޒިރީއިން %50 ދަށުގައި އުޅޭ މެމްބަރުންގެ ނަންތައް އާއްމުކޮށް، އެމެމްބަރުން ކޮށްފައިވާ މެމްބަރުކަމުގެ ހުވަޔާ ހިލާފުވެއްޖެކަމަށް މަޖިލީހުން ކަނޑައަޅައި ފާސްކުރުން