ގާނޫނު އަސާސީ ނެގެހެއްޓުމަށް ގޮވާލުން

އަޅުގަނޑުމެންގެ ކިޔުންތެރިންނަށް އެނގިވަޑައިގަންނަވާނޭ ފަދައިން ހެޔޮވެރިކަމުގެ ހަރަކާތަކަކީ ވަކި ޕާޓީއަކަށް ނުވަތަ ވަކި ސަހުސިއްޔަތަކަށް ތާއީދު ކުރާ ބަޔެއް ނޫނެވެ. ބޭނުންވަނީ ހަމަހަމަ ކަމާއި އިންސާފެވެ. ރައްކާތެރިކޮށްދެން ބޭނުންވަނީ ރައްޔިތު މީހާގެ ހައްގެވެ. ދެންފަހެ، އެމޭރުމުގައި ރައްޔިތުމީހާގެ ހައްގުގައި އަދި ތިމާމެންގެ ދަރިންނާއި އެދަރިންގެ ދަރިންގެ ހައްގުގައި ފެހި ގާނޫނު އަސާސީ ނެގެހެއްޓުމަށް އިލްތިމާސްކޮށް ގޮވާލަމެވެ. ހައިކޯޓުގެ ހުކުމަށް ތާއީދުކޮށް، ސުޕުރީމުކޯޓުން ހުކުމްކޮށް ނިންމުމުން އެނިންމުން ސިފައިން ބޮލާލައި ޖެހުމަކީ ގާނޫނުގެ ވެރިކަން ނެތިކޮށްލައި، ގާނޫނު އަސާސީ މުގުރާލުން ކަމާމެދު ޝައްކެތްނެތެވެ.

މައުމޫނަކަސް ޔާމީނަކަސް އަންނިއަކަސް މާރިޔާއަކަސް ރީކޯއަކަސް އިމްރާނަކަސް ޑރ ޖަމީލަކަސް އަބުދުއްލޯ ގާޒީއަކަސް ގާނޫނު އަސާސީ މުގުރާލުމުގެ ފުރުސަތު ދެވިގެން ނުވާނެއެވެ. އަދި އެކަމާ ގުޅޭ އެއްވެސް ބަހަނާއެއް ގަބޫލެއް ނުކުރެވޭނެއެވެ. ބަހަނާއެއް ގަބޫލުކުރެވޭނީ ގާނޫނުތަކަށް ބޯލެބުމާއި ގާނޫނު އަސާސިއަށް ހުރުމަތްތެރިކޮށް ހިތުމާ އެކުގައެވެ.

ސަރުކާރުން ދައްކާ ބަހަނާތައް

ސުޕުރީމު ކޯޓުގެ ހުކުމަށް ބޯނުލެބުމަކީ އަދި ރައީސް ނަޝީދު އައްޔަންކުރެއްވި އުއްތަމަ ފަޑިޔާރުގެ ބަސްނޭހީ ޖުޑިސަރީ ރަނގަޅުކުރުމަށް ކަމަށް ބުނުމަކީ ތާކުންތާކު ޖެހޭ ވާހަކައެއް ނޫނެވެ. އެއީ ޖުޑިސަރީ ރަނގަޅުކުރުމަކީ ބަންޑާރަ ނައިބާއި ޖުޑިސަރީ ކޮމެޓީ އާއި ރައްޔިތުންގެ މަޖިލީހުން ކުރަންޖެހޭ ކަމަކަށްވާއިރު، އެފަދަ ކަމެއް ކުރަން ބަންޑާރަ ނައިބުކޮށްފައި މިއިން ދުވަހަކު މަސައްކަތްކޮށްފައި ނުވާތީވެ އާއި ރައްޔިތުންގެ މަޖިލީހުގެ ތެރެއިން ވެރިކަން ކުރާ ޕާޓީއިން ކޮށްފައި ނުވާތީވެއެވެ. އަދި އަދަށް ދާންދެންވެސް، ޖުޑިސަރީ އިސްލާހުކުރުމުގެ ޕުލޭނެއް ނުވަތަ ހުށައެޅުމެއް ސަރުކާރުން ދައްކައިފައި ނުވާތީވެސް މެއެވެ. އަދި ހަމައެކަނި އަބްދުއްލޯ ގާޒީ ހައްޔަރުކޮށްގެން، ޖުޑިސަރީގެ ބާރުކަނޑުވާލައިގެން އެކަން ކުރެވޭނެ ކަމަށް ނުފެންނާތީވެއެވެ.

ސިފައިނާއި ފުލުހުންގެ އަމަލުތައް

ރައީސް ނަޝީދު އައްޔަންކުރެއްވި ޖީޕީ މުއިއްޒު އާއި ހިއަމަން ރައިޓްސް ކޮމިޝަނުން ސިފައިންނާއި ފުލުހުންގެ އަމަލުތައް ކުށްވެރިކޮށް ގާނޫނު އަސާސީ އާ ހިލާފަށް އަމަލުކޮށްފިކަމަށް ބުނުމަކީ ގާނޫނު އަސާސީ މުގުރާލާފިކަމުގެ ހެއްކެކެވެ. އަދި އެތަންތަނުގެ ވެރިންނާއި އެވެރިންގެ އަޑުއަހައިގެން އެއެންގުންތަކަށް އަމަލުކުރާ އަދި އަމަލުކުރި ފަރާތްތައް ގާނޫނު އަސާސީގެ ދަށުން ކުށްވެރިވާނެއެވެ. އެހެންކަމުން، އެފަދަ އެންގުންތަކުގައި ބައިވެރިވާ ފުލުހުންނާއި ސިފައިންގެ ނަންތަކާއި އެމީހުންގެ ފޮޓޯތައް ނަގައި އެމީހުންގެ މައުލޫމާތުތައް އެއްކުރަމުން ދިޔުމަށް ގޮވާލަމެވެ. އެހެނީ، ގައިރުގާނޫނީ އަމުރުތަކަށް އަމަލުކުރުމަކީ ކުށެއްކަމަށް ގާނޫނު އަސާސީގައި ބުނެފައިވުމާއެކު ފަހުން ނަމަވެސް އެފަދަ ފަރާތްތަކާމެދު ދައުވާކުރެވެން ޖެހެއެވެ.