މޫދުން ވުލޫކުރުމަކީ ހައްދުފަހަނައަޅައި ދިޔުމެއްނޫން

ބޮޑު މުޒާހަރާގައި ބަޔަކު މީހުން މޫދުން ވުލޫކޮށް، ބިންމަތީގައި ނަމާދުކުރުމުން ރައީސް ނަޝީދުވަނީ އެމީހުންނަކީ ހައްދުފަހަނައަޅާފައިވާ ބަޔެއްގެ ގޮތުގައި ސިފަކުރައްވާފައެވެ. ބަލަ، ނަޝީދެވެ. އަހަރެމެންގެ ދީނަކީ އެންމެ ފަސޭހަ ދީނެވެ. ނަމާދުކުރުމަށް ބިން ތަނަވަސްވެގެން ވެއެވެ. އަދި ވުލޫކުރުމަށް އެހެން ފެނެއް ނެތިއްޖެ ހާލަތެއްގައި މޫދުފެންވެސް ކަމުދެއެވެ. ނިކަން ވިސްނަވާ ބައްލަވާށެވެ. އެތާ އެދުވަހު އެއްވެފައި އެތިބަ އެންމެން ނަމާދު ޖެހުނު ވަގުތު އެއްފަހަރާ އެންމެންނަށް އެރޭ ވަރުގެ މިސްކިތެއް ހުރީ ކޮންތާކުތޯއެވެ؟

އަނެއްކާ މަނިކުފާނު ވިދާޅުވި ބަސްފުޅުން، މަނިކުފާނަކީ ދީނުގެ މިފަދަ ކަންތައްތައް އެނގިވަޑައި ނުގަންނަވާ ބޭފުޅެއްހެން ހާދަ ހީވެއެވެ. ނޫނީ ހަމަ ނަފުރަތު ކުރެވެނީތޯއެވެ؟ އަނެއްކާ ރައީސްކަމަށް ހުވާ ކުރެއްވިއިރު ހުވާ ކުރެއްވީ ހަމަ އަހަރެމެންގެވެސް އިލާހު މެދުވެރިކޮށްފައިބާވައެވެ؟ ދެން އަނެއްކާ، މާތްރަސްކަލާނގެ އިއްޒަތްތެރިކޮށް، އެއިލާހުގެ ނަން މަތިވެރިކޮށް ބަޔަކު އަޑުއުފުލުމުން އެކަން ވަރަށް ބޮޑު ބޮލުގެ ރިހުމަކަށް ވީކަމަށް ވިދާޅުވެވިއްޖެއެވެ. މިއީ ކިހިނެއްވީ ކަމެއްތޯ ވިދާޅުވެ ދެއްވާށެވެ.

މަނިކުފާނަކީ ނަމާދުކުރައްވާ ބޭފުޅެއް ކަމަށް ހަރުގޭގައި ވިދާޅުވީމު ނޫންހެއްޔެވެ؟ ކޮންމެ ހަރަކާތެއްގެ ދެމެދުގައި އެއިލާހުގެ ނަން މަތިވެރިކޮށް ނަހަދަމު ހެއްޔެވެ؟ ﷲ އަކްބަރޭ ވިދާޅު ނުވަން ހެއްޔެވެ؟ ވިދާޅުވާނަމަ، އެކަމާ ބިރުން ނުވަތަ ލަދުން އުޅުއްވާނެ ކަމަކަށް ނުބެލެވެއެވެ. އޭބަލަ މަނިކުފާނެވެ. ﷲ އީ އެންމެ މަތިވެރި އިލާހޭ، އެކަލާނގެ ފިޔަވައި އިލާހެއް ނުވޭ ބުނުމަށް ކޮންމެ މުސްލިމަކުމެ ފަހުރުވެރިވާނެއެވެ. ނަމަވެސް، އިސްލާމްދީން ދެކެ ރުޅިއަންނަ މީހުން އެންމެ ރުޅިއަންނަ ކަލިމައަކީ އެއީ ކަމަށް ވެއެވެ.