ހުސެން ޝިހާބާއި ނަޒާކީ ޒަކީގެ ސަފީރުކަން

ހުސެން ޝިހާބަކީ ނަޝީދުގެ ސަރުކާރުން ލަންކާއަށް ކަނޑައެޅި ސަފީރެވެ. އަބިދަރިންނަށް ކިޔަވައިދީ އަރާމު ދިރިއުޅުމެއް އުޅުމުގެ އިތުރުން އެތާ ހުރެގެން ކުރާ ކަމެއް ނޭގެއެވެ. ރާއްޖޭގެ ސަފީރަކު އެތަނުގައި ހުރެގެން ދިވެހިންނަށް ވާ ފައިދާއެއް ފެންނާކަށް ނެތެވެ. ދެން މިހެން އޮއްވާ، އަނެއްކާވެސް މިއިވުނީ އޭނާއަށް އޮސްޓްރޭލިޔާ އަށާއި ފިލިޕީންސަށް ކަނޑައަޅަން އުޅޭ ހަބަރެވެ.

އަޅެފަހެ އަޖައިބެއް ނުވާނެހެއްޔެވެ؟ ބޭނުމަކީ ކޮބާހެއްޔެވެ؟ އަނެއްކާވެސް މިހާރު ދެމުންދާ އިޔާނާތްތައް ބޮޑުކޮށް، މުސާރަ ބޮޑުކޮށް، ރައްޔިތުންގެ ބައިތުލްމާލުން ލާރިގަނޑެއް ދިނުން ހެއްޔެވެ؟ މީނާއަކީ ނަޝީދުގެ ސަރުކާރުގެ ދުވަސްވަރުގައި އެސަރުކާރާ ދެކޮޅަށް ބަޔަކު ތެދުވުމުން އެއީ އިސްލާމީގޮތުން ހައްދު ފަހަނައަޅާފައިވާ ބަޔަކު ތިބެގެން ކުރާ ކަމެކޭ ކިޔައިގެން ލަންކާގެ ނޫސްތަކަށް ބަސްދީގަތުން ދިން މީހެކެވެ.

ދެން، ސަރުކާރު ބަދަލުވުމުން ވައިޖެހޭ އަތަށް ރިޔާލައި ފައްސިކުރަމުން އޮނޑި ދުއްވާ މީހެކެވެ. ނަމަވެސް، މިސަރުކާރަކަށްވެސް އަދި ކުރީގެ ސަރުކާރަކަށްވެސް މާބޮޑު ބޭނުމެއް ހިފުނު މީހެއް ނޫނެވެ. މީނާ ލަންކާގައި ނުހުއްޓަސް ލަންކާއަށް ދިވެހިން ގޮސް އެމީހުންގެ ބޭނުންތައް ފުއްދައި އުޅޭނެއެވެ.
ހުސެން ޝިހާބަކީ މައުމޫނުގެ ދުވަސްވަރުގައި ޓީވީ މޯލްޑިވްސްގެ ވެރިއެކެވެ. އެތަނުގައި ކޮރަޕްޝަންގެ ބޮޑެތި ކަންތައްތަކެއް ހިންގާފައިވާ މީހެކެވެ. މީގެ އެއް މިސާލަކީ އޭނާގެ ގެ އޭރު ހަދައިދިނީ ޝޭޑީކެބިން މުހައްމަދު ތައުފީގެއެވެ. ޝިހާބަށް ދެއްކި ކައްފާރާއެއްގެ ގޮތުންނެވެ. އެދުވަސްވަރު ތައުފީގުގެ ވެހިކަލްތައް އޮންނަނީ މަސައްކަތެއް ނެތަސް ޓީވީއެމްއަށް ކުއްޔަށް ހިފާފައެވެ. މިގޮތުން ދެމީހުން ވެގެން ލައްކަ ލާރި ޓީވީއެމުން ކަޅާކޮށްލިއެވެ.

ނަޒާކީ ޒަކީއަކީވެސް އެގޮތަށް މެލޭޝިޔާގައި ސަފީރުކަން ކުރާ މީހެކެވެ. މީނާއަށް ނަޝީދުގެ ސަރުކާރުންވަނީ ބުރޫނާއީ އަދި ތައިލެންޑްގެ ސަފީރުކަން ހަވާލުކޮށްފައެވެ. ދެން އަނެއްކާ ޑރ ވަހީދުގެ ސަރުކާރުން އެވަނީ އިންޑޮނޭޝިޔާގެ ސަފީރުކަން ހަވާލުކޮށްފައެވެ. މެލޭޝިޔާގެ ހައިކޮމިޝަންގެ އޮފީހުގެ ހިންގުން ވަނީ ބޮއްސުންލައި، ކުރިން ސަފީރުކަން ކުރި މިދުހަތު ހިލްމީއަށް ވުރެ ދެތިން ގުނަ ތަނުގެ ހަރަދު ބޮޑުވެފައެވެ. ތަނުގައި ވެރިން ގިނަވިއިރު، ހިދުމަތުގެ ފެންވަރުވަނީ ދަށްވެފައެވެ.

ހުދު ތިމާއަކީ އޮފީހުގައި އުޅޭ މީހެއް ނޫނެވެ. އަބަދުވެސް އަމިއްލަ ވިޔަފާރީގައި ބޭންކޮކް ނުވަތަ އިންޑޮނޭޝިޔާގައެވެ. އެހެން ނޫނަސް، ތިމާގެ ކިބާގައި ޒަމާނާ ގުޅޭ ތައުލީމު ނެތުމުން ކިތަންމެ ވަރަކަށް އޮފީހަށް އަޔަސް ކުރާނީ ވަކި ކީއްހެއްޔެވެ؟ ކުޑަވަރެއްގެ ކަނޑައެއް ހިންގާގޮތަށް ތަން ހިންގިދާނެތާއެވެ؟ މެލޭޝިޔާއަކީ ދިވެހި ކިޔަވާ ކުދިން އެންމެ ގިނަ އެއް ގައުމަށް ވީއިރު އެގައުމުން ޒަކީގެ ސަފީރުކަމުގައި ދިވެހިން ހުޅުވާލެވުނީ ކިޔެވުމުގެ ކިތައް ފުރުސަތުތޯއެވެ؟ ދަރިވަރުންނަށް ލިބިދިނީ ކޮން ފަސޭހަތަކެއް ތޯއެވެ؟ އެތަނުގައި ތިބޭ އާއިލާތަކާ މެދު އަޅާލަނީ ކިހާވަރަކަށްތޯއެވެ. ތިމާއަށް ތަން ނުހިންގޭކަން އެތަނުގެ ވެބްސައިޓުން ވެސް ހާމަވެއެވެ.

ދެން އޮތީ ނަޝީދުގެ ސަރުކާރަށް ފާޑުކިޔާ، ޑރ ވަހީދުގެ ސަރުކާރަށް ތާއީދުކުރުމެވެ. މިއީވެސް އަޖައިބުވާ ވަރުގެ ކަމެކެވެ. ތިމާގެ ނަގާބިލުކަން ފެންނަން އޮތް އިރުގައި އެހެން މީހުންގެ ފަތިފުށުގެ ވާހަކަ ދެއްކޭނެ ހެއްޔެވެ؟ ނަޝީދު ދެއްވި ސަފީރުކަމެއްގައި ހުރެފައި ސަރުކާރު ބަދަލުވުމާ ވިދިގެން އެފަދަ ވާހަކަ ދެއްކުމުން މަގާމާއި ޖާހުގެ ބޭނުމުގައި ބުނިއެއްޗަކަށް ނޫނީ އެނުވޭ ހެއްޔެވެ؟ ކެރޭ މީހުންނަކީ ކެރިގެން ބަސް ބުނާ މީހުންނެވެ. މަގާމު ސަލާމަތްކުރަން ނުވަތަ ތިމާއަށް ލިބިފައިވާ އެއްޗެއް ގެއްލިދާނެ ކަމުގެ ބިރަށް ބުނަން ޖެހޭ އެއްޗެއް ބުނަން ނުކެރިފައި ހުންނަ މީހާއެއް ނޫނެވެ.

ބިޑުކުރުމަކާ ނުލައި އޮމަދޫގައި ފެނާއި ނަރުދަމާގެ ހިދުމަތް ދިނުމުގެ ނަމުގައި ތ. ކުރެދިފަރު  ކިޔާ ފަޅު ރަށެއް ކުރީގެ ނަޝީދު ވަނީ ނަޒާކީ ޒަކީއަށް ވެދުމަށް ހަދިޔާ ކޮށްފައެވެ(1). ނަމަވެސް، ފަހުން ބުނަނީ ނަރުދަނާއިން ރައްޔިތުންގެ އަތުން ފައިސާ ނަގާނަން ކަމަށެވެ.(2)

މިދެމީހުންނަކީ މިޒަމާނުގެ ތައުލީމު ލިބިފައިވާ ބަޔަކު ވެސް ނޫނެވެ. އަދި ކުރީގެ ސަރުކާރުގައިވެސް ކަމެއް ނުކުރެވިފައިވާ ދެމީހުންނެވެ. ކަން މިހެން އޮތްއިރު، ޑރ ވަހީދު އެމީހުންނަށް މާ ދީލަތިވެގެން އިނާޔަތް ބޮޑުކުރުމުގައި މިއުޅޭ ސަބަބު ބެލިއިރު ހާމަވި އެއްކަމަކީ މިމީހުންނަކީ ޑރ ވަހީދުގެ އާއިލާއާ ކައިވެނީގެ ގޮތުން ގުޅިފައިވާ މީހުން ކަމެވެ. ލާމަސީލު ނެޕޮޓިޒަމް ދެއްތޯއެވެ؟ ފެންވަރަށް ނުވަތަ ގާބިލުކަމަށް ނުބަލާ ތިމާގެ މީހުންނަށް ހަދިޔާގެ ގޮތުގައި ވަޒީފާ ބެހުން ކަން ކަށަވަރެވެ.


ހަވާލާދިނުން:
(1) ޕްލޭނިން ކައުންސިލުން ދިން ބައެއް ރަށްތައް އެމްޑީޕީ ފަރާތްތަކަށް http://www.haveeru.com.mv/dhivehi/news/117642
(2) ރަށްރަށުގައި ގާއިމުކުރާ ނަރުދަމާ އިން ކުރި އަށް އޮތްތަނުގައި އަގު ނަގާނެ ކަމަށް ސަރުކާރުން ބުނެފި  http://www.sun.mv/8223


ނޯޓު: މިލިޔުމުގައި ކުށެއް ވާނަމަ އަޅުގަނޑުމެންނަށް އީމޭލްކުރައްވާށެވެ. ދެފަރާތުގެ ބަސް ގެނެސްދިނުމަކީ އަޅުގަނޑުމެން މަރުހަބާ ކިޔާކަމެކެވެ. ހެޔޮވެރިކަމެއް ކުރުމަށް މަގުފަހިކުރުމުގެ ވަސީލަތެކެވެ.