އެމްޑީޕީގެ ފަރާތުން އިބްރާހިމް ހުސެން ޒަކީ ޕާޓީތަކުގެ މަސްވަރާތަކުގައި

އެމްޑީޕީއަކީ އެންމެ ޑިމޮކުރަޓިކް ޕާޓީކަމަށް ދައުވާ ކުރެއެވެ. ނަމަވެސް، މިހާރު ޕާޓީގައި ނަގާ ކިޔާ ގިނަ މީހުންނަކީ މެމްބަރުންގެ ވޯޓުން ހޮވިފައިތިބި އިންތިހާބީ މަގާމުތަކެއްގައި ތިބި ބަޔެއް ނޫނެވެ. ކުރީގެ ރައީސް ނަޝީދުގެ ވެރިކަން ބަދަލުވުމާ ގުޅިގެން އެމްޑީޕީގެ ފަރާތުން ވާހަކަ ދައްކާ ތަން ފެންނަނީ އެހެން ބަޔެކެވެ. މެމްބަރުން އިންތިހާބުކޮށްފައި ހުރި ޕާޓީގެ ރައީސްގެ ދައުރު ހަނިކޮށްފައި ހުރިތަން ފެންނަނީ މާ ސާފުކޮށެވެ. ޕާޓީގެ ނަމުގައި ހިންގޭ ގިނަ ހަރަކާތްތައް ހިންގެނީވެސް ޕާޓީގެ އެއްވެސް ގުނަވަނަކުން ފާސްކޮށްގެންނެއް ނޫނެވެ.

މިހާރު ކުރިއަށްދާ ރާއްޖޭގެ ސިޔާސީ ޕާޓީތަކުގެ މެދުގައި ބާއްވާ މަސްވަރާތަކުގައި ޕާޓީގެ ފަރާތުން ރޭގައި ބައިވެރިވެފައިވަނީ ޕާޓީގެ ރައީސްގެ މަގާމަށް ކުރިމަތިލައިގެން ޕާޓީގެ މެމްބަރުން ނޫނެކޭ ބުނެފައިވާ މައުމޫނުގެ ސަރުކާރުގައި އުޅުނު އިރުވެސް ފަސާދައާއި ކޮރަޕްޝަނުން ފެންވަރައިގެން ހުންނެވި އިބްރާހީމް ހުސެން ޒަކީއެވެ. ޕާޓީގެ ރައީސަށް މިބައްދަލުވުން ތަކުގައި ޕާޓީގެ ފަރާތުން ވާހަކަ ނުދެއްކެނީ ކީއްވެތޯއެވެ؟ ދިވެހި ބަސް ވެސް އެނގިވަޑައި ނުގަންނަވަނީ ތޯއެވެ؟ އެހެންނެއް ނޫނެވެ. އެމްޑީޕީ މިވަނީ މަދުބަޔަކު ހިސޯރުކޮށް، އެމީހުން އެގެންދަނީ ޕާޓީގެ ނަމުގައި ތިމާމެންގެ އަމިއްލަ ކަންތައްތަކެއް ހިންގަމުންނެވެ.

ރާޅުގަނޑުގައި އެޖަހާ ސަކަރާތަކީ ޕާޓީގެ އެއްވެސް ގުނަވަނަކުން ފާސްކޮށްގެން އުޅޭ ކަމެއް ނޫނެވެ. އެކަންވަނީ ޕާޓީގެ ސިޔާސީ ބަސް ބުނާނެ ފަރާތްކަމުގައިވާ ޕާޓީގެ ރައީސް ވިދާޅުވެފައެވެ. އަންނި ވެރިކަމަށް އައުމަށް ބަޔަކު މީހުން ހައްލައިގެން ޕާޓީގެ ނިވަލުގައި ހިންގާ ޕާޓީގެ ދުސްތޫރާ ހިލާފު ހަރަކާތެކެވެ. 17 ފެބްރުއަރީގައި ޕާޓީގެ ފަރާތުން އިންތިޒާމުކުރި "އިންސާފުގެ ދަތުރު"ގެ މަގުސަދުވެސް ވަނީ ބަދަލުކޮށްފައެވެ. މިހާރު އެއީ "އަންނި ވެރިކަމަށް ގެނެސްދީ" ގޮވާލުމުގެ ގޮވެލި ފައްޗެކެވެ. ޖުޑިސަރީ ރަގަޅުކުރުމާއި ގައުމުގައި އިންސާފު ގާއިމުކުރުމުގެ ވާހަކައެއް މިހާރަކު ނެތެވެ. އެކަމާ އުޅޭކަށްވެސް ބޭނުމެއް ނޫނެވެ.

ޕާޓީގައި މިއޮތް ހުރިހާ ދުވަހު އިންތިހާބު ނުކުރާ ޗެއާޕާސަންއެއް ނެތް އިރު ރިޔާސީ ކެޑިޑޭޓަކު އިންތިހާބު ކުރުމަށް ގޮވާލުމުން ސުވާލު ނުއުފެދޭތޯއެވެ. ޕާޓީގެ ދުސްތޫރު ބުނާގޮތުން ޗެއާޕާސަން ނެތް އިރެއްގައި އެމަގާމު ފުރާނީ ޖެނެރަލް ސެކެރެޓަރީގެ ނައިބު އިދާރީއެވެ. ނަމަވެސް، އެސޮރަކީ ޕާޓީ ހިސޯރުކޮށްގެން އުޅޭ މީހުން ބޭނުންވާ މީހަކަށް ނުވީމަ ވަގުތީ ބޯޑެއް އަޅުވާފައި ރީކޯ މޫސަ ބަހައްޓައިގެން ޑިމޮކުރަސީ ދިރުވަނީތޯއެވެ؟ ޕާޓީގެ ފަރާތުން އިންތިހާބެއް ބާއްވާއިރު ޗެއާޕާސަންގެ އިންތިހާބު ނުބޭއްވެންވީ ކީއްވެތޯއެވެ؟ ރީކޯގެ މަގާމު ގެއްލިދާނެތީ ބިރު ގަންނަނީ ތޯއެވެ؟