ހެޔޮވެރިކަމެއް ކުރެވޭނީ ފާޑުކިޔުންތައް ހަޖަމުކުރެވިގެން

ލާދީނީ ސަރުކާރެކޭ ބަޔަކު ކިޔަނީ ސަބަބުތަކެއް ނެތިއެއް ނޫނެވެ. ތަކުރާރުކޮށް ސަރުކާރުން ރައްޔިތުންގެ ނުރުހުމުގައި އަދި ރައްޔިތުން ކަންތައްތަކެއް ތިޔަހެން ނުކުރާށޭ ބުނާއިރުވެސް ގޮތް ދޫނުކޮށް އެކަމެއް ކުރަން ވިއްދާވަރުންނެވެ. ތިމާމެންނަކީ ލާދީނީ ބަޔެއް ނޫންކަން ސާބިތުކޮށްދިނުމަށް އަމަލީގޮތުން ކަންތައްތަކެއް ކުރުމަށް އެތަކެއް ފުރުސަތެއް ލިބިއްޖެއެވެ. ތަފާތު ބަހަނާތައް ދައްކައި، އެފުރުސަތުތައް ނަގާލި ކަމަށްޓަކައި އަހަރެމެން ފުން ހިތާމައެއް ކުރަމެވެ. ދެން އަދަކުން، 'ތިޔަހެން ނުކިޔާށޭ" ބުންޏެއްކަމަކު އަޑުއަހާނެ މީހަކު ހެޔޮވިސްނޭ މީހުންގެ ތެރެއަކު ނުތިބޭނެއެވެ.

ކޮންމެއަކަސް، ހަގީގަތަކީ އިދިކޮޅު މީހުން ފާޑުފާޑުގެ ވާހަކަ ދައްކާނެއެވެ. އެކަން ޖެހޭނީ ހަޖަމްކުރާށެވެ. އެއީ ޑިމޮކުރަސީގެ ރީތި ގޮތެވެ. މައުމޫނުގެ ދިގުލީ ވެރިކަން ނިމުމަކަށް ގެންނަން ޖެހުނު އެއް ސަބަބަކީވެސް ފާޑުކިޔުން ހަޖަމް ނުކުރެވުމެވެ. ފާޑުކިޔުމަކީ ހަގީގަތުގައި ކުރިއެރުމެކެވެ. ކަންތައްތަކެއް ރަނގަޅުކުރުމަށް ހުޅުވޭ ފުރުސަތުތަކެކެވެ. ޑރ. ޖަމީލުމެން ކިޔަމުން އެދާ ފާޑުކިޔުންތަކުން، ކަން އޮތީ އެހެން ނޫންކަން އަމަލުން ސާބިތުކޮށްދިނުމަށް އެހުޅުވުނީ ފުރުސަތެކެވެ. އިންތިހާބެއްގައި އެންމެ މުހިއްމު ދައުރެއް އަދާކުރާ ބަޔެއްކަމުގައިވާ ވަކި ފަރާތަކަށް ނުޖެހޭ ރައްޔިތުން އެތިބީ ސަރުކާރުން ކަންކުރާ ގޮތެއް ބަލާށެވެ.

ޑރ. ޖަމީލު ނުވަތަ ސަންދާނު އަހަންމައިދީ ބިޑި އަޅުވައިގެން ދޫނިދޫއަށް ގެންދިޔުމަކީ ސަރުކާރަށް ލިބޭ ކުރިއެރުމެއް ނޫނެވެ. ފާޑުކިޔުން ހަޖަމް ނުކުރެވޭކަމާއި ޑިމޮކުރަސީގެ ހަމަތަކުން ތިމާމެންނަށް ވެރިކަން ކުރަން ނޭނގޭކަމަށް ރައްޔިތުންނަށް ގަބޫލުކުރުމަށް ދެވޭ ފުރުސަތުތަކެކެވެ. ތިމާގެ ޕާޓީ ތެރޭގައި ތިބި ހެޔޮވިސްނޭ މީހުންގެ ކުރިމަތީގައި އަގުވެއްޓި، ބޭރު ދުނިޔޭގައި އަގުވެއްޓޭނެކަމެކެވެ. އެހެންކަމުން، މިއީ އެއްވެސް ހާލެއްގައި ހެޔޮވެރިކަމެއް ކުރުމުގެ ނިޔަތުގައި އުޅޭ ސަރުކާރަކުން ކޮށްގެންވާނެ ކަމެއް ނޫނެވެ. ޑިމޮކުރަސީގެ ހަމަތައް ގަބޫލުކުރާ ތިމާމެންގެ ޕާޓީގެ އެތަކެއް ބަޔަކު ފޫހިކޮށް ޕާޓީއާ ދުރަށް ޖެހޭނެ ކަމެކެވެ. އަދި ކުރީގެ ރައީސް މައުމޫނު ނޫސްވެރިންނާއި އޭނާއާ ދެކޮޅު މީހުންނާ މެދު އަމަލުކުރިގޮތް ހަދާނަށް އަންނާނެކަމެއްވެސް މެއެވެ.

ފާޑުކިޔުމަކީ ކުރިއެރުމެވެ. ކަންތައްތައް ރަގަޅު ކުރުމަށް ލިބޭ ފުރުސަތެކެވެ. ފާޑުކިޔުމުގެ ތެރޭގައި ބިނާކުރަނިވި ގޮތުގައި ކިޔާ ފާޑުކިޔުންތަކާއި ކުރެވޭ ނަފްރަތުގެ ސަބަބުން ކިޔޭ ފާޑު ހުންނާނެއެވެ. ބިނާކުރަނިވި ފާޑު ކިޔާނީ އަހަރެމެން ފަދަ އެމްޑީޕީގެ މެމްބަރުންނެވެ. އިދިކޮޅު މީހުން ކިޔާނީ އޮންނަ ހަސަދައަކުންނެވެ، އެއީ ކޮންމެ ތަނެއްގައިވެސް ކަން ވާގޮތެވެ. އަދި ވަކިން ހާއްސަކޮށް ތިންވަނަ ދުނިޔޭގެ ގައުމުތަކުގައި އާއްމުކަމެކެވެ. އެއީ ތީމާ އޭގެ ތެރެއަށް ނުވަދެ ނުވަތަ ތިމާގެ ޖަޒުބާތު އޭތެރެއަށް ނުލައި އެއްޗެއް ބުނަން އެނގޭމީހުން މަދުވާނެތީވެއެވެ.

ނިންމާލުމުގެ ކުރިން ރައީސް ނަޝީދަށް ދަންނަވާލަން ބޭނުން ވާހަކައެއް އެބައޮތެވެ. ގޮތް ދޫކުރައްވާށެވެ. ޑރ. ޖަމީލުމެން އަވަހަށް ދޫކޮށްލައްވާށެވެ. އެބޭފުޅުން ހިފަހައްޓައިގެން ސަރުކާރަށް ވާނެ ފައިދާއެއް ނޯންނާނެއެވެ. މިހާރުގެ ގާނޫނު އަސާސީއިން ތިޔަ ހިތަށް އަރާގޮތްގޮތަށް ކަންތައްތައް ކުރުމަކަށް ފުރުސަތެއް ނުދެއެވެ. ބުއްދި އިސްކުރައްވާށެވެ. ތިމާއަކީ ފާޑުކިޔުން ހަޖަމްކުރެވޭ އަދި ޑިމޮކުރަސީގެ މިސާލެއް ފަދަ ރައީސެއްކަމުގައި ދައްކުވާދެއްވާށެވެ. އަދި ތިމާގެ ސަރުކާރަކީ ލާދީނީ ސަރުކާރެއް ނޫންކަން އަމަލުން ރައްޔިތުންނަށް ދައްކުވައިދެއްވާށެވެ. އައްޑޫއިން ބުދުތައް ނަގާށެވެ. މީހުން އުޅޭ ރަށްރަށުގައި ރާވިއްކުމަށް ދޮރުތައް ނުހުޅުވާނެކަމުގެ ޔަގީންކަން ރައްޔިތުންނަށް ދެއްވާށެވެ.