ހެޔޮވެރިކަމެއްގެ ނަމުގައި ޖައްބާރުވެރިކަމެއް

ތިރީސް އަހަރަށް ދެމިގެންދިޔަ ހުދުމުހުތާރު ވެރިކަމެއް ނިމުމަކަށް ގެނައުމަށް ރާއްޖޭގެ ކަންކޮޅުތަކުން މީހުން ނުކުތީ ހެޔޮވެރިކަމެއް ހޯދުމަށެވެ. އެންމެންނަށް ބައިވެރިވެވޭ، ގައުމުގެ މުއްސަދިކަން އެންމެންނަށް ހަމަހަމަކޮށް ބަހާދޭނެ، ގައުމުގައި އިންސާފާއި ހަމަޖެހުން ގެނުވާނެ ހެޔޮވެރިކަމެއް ގާއިމުކުރުމުގެ ބޭނުމުގައެވެ. މީގެ ތެރެއިން މިއަދު ހާސިލުވީ ކޮންކަމެއްތޯއެވެ؟

ކޮރަޕްސަން ހުއްޓުވިއްޖެތޯއެވެ؟ ނޫނީ މަދުކުރެވިއްޖެތޯއެވެ؟ ޓުރާންސްޕޭރަންސީގެ މީޓަރުތަކުން ދައްކާގޮތުގައި މިހާރުގެ ހާލަތު ކުރީގެ ރައީސް މައުމޫނުގެ ހާލަތަށް ވުރެ ގޯހެވެ. އެބަހީ، ކޮރަޕްސަންގެ އަމަލުތައް މިގައުމުގައި އިތުރުވެއްޖެއެވެ. ދައުލަތުގެ އެންޓިކަރަޕްސަން ކޮމިސަނުން ނެރޭ ރިޕޯޓުތަކުން އެކަން ހާމަވެއެވެ. ދޭތެރެ ދޭތެރެއިން ސަރުކާރުން ކޮރަޕްސަނަށް މަގުފަހިވާގޮތަށް ކުރާކަންތައް ފާހަގަކޮށް ސަރުކާރަށް ހަދުމަކޮށްދެން ޖެހެއެވެ. ނޫނީ ސަރުކާރުން ކުރާ ކަންތައްތައް ވަގުތުން ހުއްޓާލުމަށް އަންގަންޖެހެއެވެ.

ކުރިންވެސް މިގައުމަށް ލިބޭ އާއްމުދަނީ ލިބެއެވެ. ގައުމަށް ބޭނުންވާވަރަށް ޑޮލަރު ވަދެއެވެ. ރައްޔިތުންގެ ހާލަތު ރަނގަޅެއް ނުވެއެވެ. ތަކެތީގެ އަގު އުފުލެނީއެވެ. ފަގީރުންނާއި މުއްސަދިންގެ ފަރަގު ފުޅާވަމުންދަނީއެވެ. މިސަރުކާރަކަށް ކުރެވުނު ކަމެއް އަދި ނެތެވެ. ރިސޯޓުތަކުން ލިބޭ އާއްމުދަނީއިން ދިވެހި ދައުލަތަކަށްވެސް އަދި ދިވެހިރައްޔިތުންނަކަށް ވެސް އެއްވެސް މަންފާއެއް ނުލިބެއެވެ. އޭގެ މަންފާ އަދިވެސް ކުރަނީ އިހުކުރި މީހުންނަށެވެ. އެއީ ބޭއިންސާފުން ހަމައެއް އުސޫލެއްނެތި ރިސޯޓުތައް ހަވާލުކުރެވިފައިވާ ވިޔަފާރިވެރިންނެވެ. ދުނިޔޭގެ ނިސްބަތުން މިލިއަނަރުންނާއި ބިލިއަނަރުންނެވެ.

މިއަދު ކެނެރީގޭ ނަޝީދުގެ ބޭނުމަކީވެސް އެވެރިން ހިތްހަމަ ޖައްސައިދީގެން، އެވެރިން މެދުވެރިކޮށް ވޯޓުކޮޅު ގަނެލުމެވެ. އެނޫން ކަމެއް ކުރާ ތަނެއް ނުފެނެއެވެ. މީގެ ހެއްކަކީ ރިސޯޓުތަކުގައި މަސައްކަތްކުރާ މީހުންގެ ހައްގުތައް ގެއްލިވާއިރު އެމީހުންގެ އަޑު އެހުމުގެ ބަދަލުގައި އެމީހުންގެ އަގާގައި މަލަން އެޅުމަށްޓަކައި ރިސޯޓުތަކުގައި މުޒާހަރާތް ނުކުރޭނެގޮތަށް މަޖިލީހަށް ބިލެއް ހުށައަޅާފައިވުމެވެ. އަދި އެރިސޯޓުވެރިންގެ ހައްގުތައް ފުޅާކުރުމަށްޓަކައި ރިސޯޓު އޯނަރެއްގެ އަންބަކާ ޓޫރިޒަމް މިނިސްޓުރީ ހަވާލުކުރުމެވެ. ކުރިން ބުނަމުންއައި މަސްލަހަތު ފުށުއަރާކަމަކަށް މިއަދަކު ނުވިއެވެ.

މިގައުމުގައި އަދުލު އިންސާފާއި ހަމަހަމަކަން ގާއިމުކުރުމަށް ކުރާކަމެއް ނުފެނެއެވެ. އަބަދުވެސް ފެންނަނީ ދިވެހިން ރުޅިއަރުވަން މަސައްކަތްކުރާ ތަނެވެ. އެއް ފަހަރަކު މާލެތެރޭގައި ރާވިއްކުން ހުއްދަކުރެވޭތޯއެވެ. ނޫނީ ދެޖިންސުގެ ދަރިވަރުން މަސްހުނިކޮށްލެވޭތޯއެވެ. ނޫނީ އިސްލާމުދީން ކިޔަވާދިނުން ހުއްޓުވޭތޯއެވެ. ނޫނީ ޑަކުޓަރީ ތަމުރީނުނެތް ބަޔަކު އިޒުރޭލުން ގެނެސް ދެން ތިބިބަޔަކު ރުޅިއެރުވޭތޯއެވެ. ގައުމު ހަމަޔަކަށް އެޅުވުމަށް ކުރަންޖެހޭ އެތަކެއް ކަމެއް ބަހައްޓާފައެވެ. ގައުމުގެ ހާލަތު އެއްދުވަހުން އަނެއްދުވަހަށް ގޯސްވަމުންދާއިރުގައެވެ. ގައުމުގެ އިގުތިސާދު ބޮއްސުންލައި ތަކެތީގެ އަގު އުފުލެމުންދާއިރުއެވެ.